Ajet Alibehaj, një djalë i ri nga Mallakastra, po përballet me ditët më të vështira të jetës. Ai është diagnostikuar me limfomë, një sëmundje e rëndë që i ka lodhur trupin, por jo shpirtin e tij luftarak.

Pas dy ndërhyrjeve kirurgjikale të rënda dhe disa cikleve të kimioterapisë, Ajeti ndodhet aktualisht në një spital në Stamboll, ku mjekët kanë rekomanduar edhe tre kimioterapi të tjera dhe një ndërhyrje të fundit vendimtare për jetën.

Ajet Alibeaj, 3 muaj me pare kur nisi kimioterapine dhe operacionet
Familja e tij ka bërë gjithçka për ta mbajtur trajtimin në vijim, por kostot e larta spitalore jashtë vendit (në Turqi, i vetmi vend ku i dhanë shpresë për jetën) e kanë lënë pa zgjidhje.

Në një apel prekës nga shtrati i spitalit për JOQ Albania, Ajeti shihet i transformuar nga sëmundja, por me guxim për të bërë dhe këtë betejë të fundit e për t’u kthyer shëndoshë e mirë në Shqipëri.

Edhe pse më parë janë mbledhur 38 mijë euro falë zemrës së mirë të njerëzve, ato fonde fatkeqësisht nuk mjaftuan për shkak të ndërhyrjeve të papritura dhe trajtimeve shtesë që kërkoi gjendja e Ajetit. Sot, çdo ditë për të është një betejë mes dhimbjes dhe shpresës, mes frikës dhe forcës.

Urim Alibehaj, vëllai i Ajetit, bën sërish një thirrje të ndjerë për ndihmë për shqiptarët të cilët kanë mundësi. Çdo kontribut, sado i vogël, është një hap drejt shërimit. Të gjithë ata që duan të ndihmojnë, mund të kontribuojnë financiarisht dhe ta shpërndajnë këtë thirrje për t’i dhënë Ajetit një mundësi tjetër për jetë.