Elvis Shkambi, autori i vrasjes së gjykatësit të Apelit Astrit Kalaja, deklaroi në seancën për dhënien e masës së sigurisë ndaj tij, se i kërkon falje publike familjes së gjyqtarit.

“Ngjarja ka ardhur si pasojë e tronditjes psikike nga kalavari i gjatë i gjyqeve. Gjykata nuk e ka zgjidhur çështjen ndër vite, institucionet nuk kanë bërë detyrën”, citohet të ketë thënë Shkambi. Për të, Gjykata e Tiranës caktoi masën arrest në burg.

Ai akuzohet për “Vrasje e funksionarëve publikë”, dhe “Vrasje në rrethana të tjera cilësuese” të mbetur në tentativë, ndërsa për xhaxhin e tij ka nisur procedimin gjithashtu për “Vrasje në rrethana të tjera cilësuese” të mbetur në tentativë, për plagosjen nga nipi i tij i Rakip dhe Elvis Kurtajt, palë kundërshtare në procesin gjyqësor.

Ndërsa xhaxhai i tij, Gjon Shkambi, akuzohet për “Vrasje në rrethana të tjera cilësuese” të mbetur në tentativë, për plagosjen nga nipi i tij i Rakip dhe Elvis Kurtajt, palë kundërshtare në procesin gjyqësor. Sipas Prokurorisë, ai ka shtyrë nipin të qëllojë edhe mbi babë e bir, pasi qëlloi mbi gjykatësin Kalaja.

Gjykata Penale e Tiranës vendosi masën e sigurisë “arrest në burg” për tre personat e arrestuar.

Në këtë seancë, gjyqtarja Marinela Osmani vendosi masat e arrestit me burg ndaj Elvis Shkambit, autorit të vrasjes, xhaxhait të tij Gjon Shkambit, si dhe punonjësit të sigurisë në Gjykatën e Apelit, Banush Koxhaj, i dyshuar për shpërdorim detyre.

Seanca u zhvillua nën masa të forta sigurie ndërsa drejtuesi i Prokurorisë së Tiranës, Arenc Çela, i cili ka marrë në dorë dosjen e hetimit, kërkoi masën e sigurisë “arrest me burg” për të arrestuarit.

Seanca u mbajt në Dhomën Penale të Gjykatës së Tiranës me dyer të mbyllura. Elvis Shkambi, 30 vjeç, përballet me tre akuza të rënda nga Prokuroria: vrasja e funksionarit publik, vrasja e kundërshtarëve në gjyq (e mbetur në tentativë) dhe armëmbajtje pa leje. Ai është i dyshuar gjithashtu për plagosjen e Rakip dhe Ervis Kurtajt, baba e bir.

Për Gjon Shkambin, 56 vjeç, Prokuroria ka ndryshuar referimin e Policisë, e cila më parë e kishte akuzuar edhe për vrasjen e gjyqtarit.

Aktualisht, ai dyshohet vetëm për dijeni në lidhje me planin e nipit të tij, por lidhur me palën tjetër në gjyq, Rakip dhe Ervis Kurtajn, ku dyshohet se ka luajtur rolin e nxitësit në tentativën e vrasjes.

Prokuroria thekson se Gjon Shkambi ka bërë kërcënime publike në emisione televizive, duke deklaruar se do të vriste personat që sipas tij kishin zaptuar një godinë trekatëshe në Shkodër. Madje, vetë familjarët kanë kallëzuar në polici për kanosjet e marra prej tij.

Vrasja e gjyqtarit Astrit Kalaja në sallën e gjyqit ka tronditur sistemin gjyqësor shqiptar. Zyrtarët më të lartë të drejtësisë kanë reaguar ashpër, duke kërkuar masa të forta për garantimin e sigurisë së gjyqtarëve në gjithë vendin.