Në një deklaratë të fortë televizive, juristja Eni Çobani ka zbardhur dokumentet që provojnë se Gjon Shkembi, familjari i autorit të vrasjes së gjyqtarit Astrit Kalaja, ka blerë godinën në Shkodër në mënyrë të ligjshme dhe të miratuar nga shteti shqiptar.

Në emisionin “Përballë lajmit” në Klan News, Çobani tha se prona për të cilën shpërtheu konflikti tragjik, është blerë nga Bashkia Shkodër për 166 milionë lekë të vjetra, me miratim zyrtar nga Këshilli i Ministrave.

“Gjon Shkembi e ka blerë godinën nga Bashkia Shkodër për 166 milionë lekë dhe kontrata është e miratuar nga Këshilli i Ministrave,” – deklaroi Çobani, duke treguar dokumentet në studio.
Ajo shtoi se familja Shkembi ka pasur të gjitha dokumentet e rregullta të pronësisë, por për vite me radhë gjykatat kanë zvarritur njohjen ligjore të pronës, duke e lënë çështjen pezull dhe pa ekzekutim.

“Gjon Shkembi e kishte objektin me dokumenta të rregullta, por gjykatat i kanë shtyrë për vite me radhë të drejtën e pronësisë së familjes,” – shtoi Çobani.
Deklarata e juristes ngre pikëpyetje të mëdha mbi zvarritjet e sistemit gjyqësor dhe rolin e institucioneve shtetërore në çështje të pronave që kanë degjeneruar në konflikte të rënda, si ai që çoi në vrasjen e gjyqtarit Kalaja.