Një gazetar italian ka shpërthyer në komente pas incidentit me turistët italianë në Berat, të cilët u larguan pa paguar nga një restorant.
Gazetari Tommaso Cerno shkruan se kryeministrja italiane Giorgia Meloni ka bërë një gjest të mirë duke paguar faturën e tyre, por shton se “nëse ambasada shqiptare do t’i duhej të paguante vjedhjet që kanë bërë shqiptarët në 20 vite, Shqipëria do të falimentonte si shtet”.
“Gjest i bukur nga Meloni për faturën e papaguar të një grupi hajdutësh italianë. Por nëse ambasada shqiptare do të dëmshpërblente Italinë për vjedhjet e kryera në 20 vitet e fundit nga qytetarët shqiptarë, ajo do të falimentonte”, shkruan ai.
Kujtojmë se pak ditë më parë, “prozhektorët” e mediave italiane u kthyen nga kryeministri shqiptar, pas një meme-je, ku Rama krahasonte shqiptarët që iknin në Itali në vitin 1991, me turistët italianë që tashmë vijnë për pushime në Shqipëri.
