Në Kep Merli, zyrtari i lartë nga Abu Dhabi – djali i themeluesit të Emirateve, sheikut të ndjerë Zayed bin Sultan Al Nahyan – është pritur nga vetë Kryeministri Edi Rama, i shoqëruar nga ministrja e Infrastrukturës dhe Energjisë, Belinda Balluku, si dhe ministri i Mbrojtjes, Piro Vengu. Pamjet e siguruara tregojnë një atmosferë joformale, ku kryeministri shqiptar shfaqet i veshur me rroba plazhi, kapele kaubojsi dhe syze dielli, duke e kthyer takimin diplomatik në një moment të rrallë për t’u parë.
Kjo është vizita e dytë e Al Nahyan në Shqipëri, pas një ndalese të mëparshme ku janë diskutuar bashkëpunime ekonomike dhe investime strategjike. Sipas burimeve, takimi i kësaj here ka pasur më shumë karakter miqësor, por nuk përjashtohet që të jenë prekur edhe çështje të projekteve të ardhshme në infrastrukturë, turizëm dhe energji.
Pas një dreke të shtruar në resort, Rama është parë teksa e shoqëron mysafirin e tij deri në port, duke shkëmbyer batuta dhe duke i treguar me dorë drejt ishullit grek të Korfuzit, i dukshëm në horizont. Pamjet tregojnë një atmosferë të qeshur dhe miqësore mes palëve, duke dhënë një imazh të rrallë të marrëdhënieve të ngushta të Shqipërisë me një nga vendet më të fuqishme ekonomikisht në botë.
Abdullah bin Zayed bin Sultan Al Nahyan, i cili mban detyrën e ministrit të Jashtëm të Emirateve që nga viti 2006 dhe është një nga katër zëvendëskryeministrat e vendit që prej vitit 2009, njihet për rolin e tij kyç në politikën e jashtme të Abu Dhabit dhe për afrimin e tij me vendet e Ballkanit. Vizita e tij në jug të Shqipërisë vjen në kulmin e sezonit turistik, duke e vendosur edhe njëherë vendin tonë në hartën e destinacioneve të preferuara të elitës botërore.
