“Me vullnetin e Zotit, shumë shpejt do të kemi një sistem mbrojtjeje që askush të mos guxojë të na cënojë,” u shpreh Erdogan gjatë një konference për shtyp, duke sinjalizuar për një epokë të re në politikën mbrojtëse të vendit.
Erdogan zhvilloi një bisedë me kancelarin gjerman Friedrich Merz, ku u diskutua situata kritike në Lindjen e Mesme. Ai përsëriti qëndrimin e tij se “çështja bërthamore iraniane duhet zgjidhur përmes dialogut”, duke e pozicionuar Turqinë si faktor që synon uljen e tensioneve përmes diplomacisë.
Pavarësisht forcës së madhe tokësore të ushtrisë turke, ekspertët si Ozgur Unluhisarcikli nga “German Marshall Fund” shprehen se mbrojtja ajrore mbetet një dobësi strategjike për Ankaranë, ndaj përforcimi i saj konsiderohet prioritet.
Deklaratat e presidentit turk nuk kanë kaluar pa reagime. Ministri i Jashtëm izraelit, Gideon Saar, e akuzoi Erdogan për “ambicie imperialiste” dhe për kufizimin e lirive të brendshme, duke e përshkruar si faktor destabilizues në rajon.
Megjithatë, Erdogan ka shprehur gatishmërinë e tij për të ndërmjetësuar në negociatat për programin bërthamor të Iranit. Ai ka kontaktuar me liderë të ndryshëm ndërkombëtarë në përpjekje për të ndalur përshkallëzimin e konfliktit.
Në vetë Turqinë, rritet shqetësimi për pasojat e një lufte të mundshme. Varësia ndaj energjisë së importuar dhe frika për rritje të çmimeve e fluks refugjatësh nga Irani po ngjallin alarm tek opinioni publik dhe ekonomistët vendas.
