Analisti politik i njohur për qëndrimet e tij të forta kosovacentrike, Nexhmedin Spahiu tha të dielën se do të luftonte kundër Shqipërisë në rast se ajo e sulmon Kosovën. Në një deklaratë në emisionin Kampionët në Kanal 10, Spahiu u rikthye për të dhjetën, qindrën herë te debati i etnisë, kombit dhe shtetit.
“Janë, nuk e di sa kombe latino-amerikane, që e flasin gjuhën spanjolle. Prej Meksikës e deri në Kili. Ka plot kombe si Rumania e Moldavia të cilat janë dy kombe të cilat e flasin të njëjtën gjuhë”, tha Spahiu derisa përpiqej t’u ligjëronte panelistëve të tjerë, kryesisht persona të lidhur me fushën e sportit, për kombin dhe etninë.
Tutje, i pyetur nga moderatori nëse do të luftonte ndaj Shqipërisë, ai tha se “sigurisht që po”.
“Nëse kish me sulmu [Shqipëria], Kosovën, sigurisht që do të kisha luftuar kundër çdo kujt që e sulmon Kosovën”, tha Spahiu.
“Por, Shqipëria shyqyr Zotit, jo vetëm që është vetëm vend mik me Kosovën, por është edhe vend vëlla”, u shpreh ai.
