Presidenti i Shteteve të Bashkuara, Donald Trump, mësa duket nuk është duke u brengosur për luftën tregtare me Kinën, Kanadanë e Meksikën.

Duke folur nga aeroplani zyrtar “Air Force One” në lidhje me taksat që vendi i tij ka kërcënuar se do t’ua vendosë këtyre shteteve dhe masat e paralajmëruara hakmarrëse të tyre kundër ShBA-së, Trumpi tha: “E tëra që di është kjo: ne do të marrim qindra miliarda dollarë nga taksat dhe ne do të bëhemi aq të pasur, saqë ju nuk do të dini se ku t’i shpenzoni të gjitha ato para, po ju them, vetëm shikoni.”

“Do të kemi vende pune, do të kemi fabrika të hapura, do të jetë për mrekulli” – shtoi ai, duke u mbajtur për një çast me të dyja duart për aeroplani për shkak të luhatjes gjatë fluturimit.

Shtetet e Bashkuara kanë paralajmëruar taksa masive ndaj Kanadasë e Meksikës, vende fqinje, si dhe ndaj ekonomisë së dytë më të madhe në botë, Kinës.

Para disa ditëve, kreu i Shtëpisë së Bardhë e shtyu futjen në fuqi të taksave ndaj shumë mallrave nga Kanadaja e Meksika.

Pas një bisede telefonike me homologen meksikane, Claudia Sheinbaum, Trumpi deklaroi: Meksikës nuk do t’i kërkohet që të paguajë taksa për asgjë” që është pjesë e një marrëveshjeje tregtare ekzistuese mes këtyre dy shteteve dhe Kanadasë, e njohur si USMCA.

Taksat nuk paguhen nga shtetet, por nga importuesit – në këtë rast kompanitë amerikane – të cilat blejnë produkte nga bizneset në shtetet e shënjestruara.