Në një intervistë për median greke “Liberal”, Sali Berisha deklaroi se Shqipëria nuk i plotëson kriteret për t’u anëtarësuar në Bashkimin Europian.
Kryeministri Edi Rama ka deklaruar disa herë që Shqipëria do të jetë gati për anëtarësim brenda vitit 2030, duke e shpallur këtë si objektivin madhor të tijin dhe Partisë Socialiste, por për Berishën, kjo është e pamundur.
“Në mënyrë absolute Shqipëria nuk plotëson asnjë kriter, përveç pozicionit gjeostrategjik, për të cilin unë e mbështes procesin. Por kriteret… Një vend që arreston në vitin elektoral 3 liderë të opozitës, e partive kryesore, një vend që u merr mandate me gjykata kundërshtarëve politikë, se i kontrollon ato, një vend që kontrollon mediat në mënyrë të pamëshirë dhe shpall se do mbyllë rrjetet sociale, TikTok-un, një vend që ka të burgosur, ka një drejtësi politike dhe mungesë të një procesi ligjor të drejtë”, tha Berisha.
