Jo vetëm në Tiranë por në bregdetin e jugut të Shqipërisë po rriten frikshëm çmimet e apartamenteve, ndërsa është rritur kërkesa nga blerësit e huaj.

Në resortet në zonat bregdetare si: Palasë, Orikum dhe Sarandë çmimi maksimal i shitjes së apartamenteve arriti 4,000 euro për metër katror.

Në vijën e parë të ndërtimit të resorteve në Lungomare apartamentet po shiten me çmim 3,500 euro për metër katror. Agjentët e pasurive të paluajtshme pohojnë se në vijën e parë për zonat bregdetare të jugut nuk gjen pasuri të paluajtshme me çmim nën 3,000 euro.

Në Golem çmimi maksimal i shitjes arriti 1,500 euro për metër katror dhe në Gjirin e Lalëzit vlerat variojnë nga 2,400 deri 3,300 euro për metër katror. Në zonën e shkëmbit të Kavajës çmimet maksimale të shitjes kanë arritur 1,800 euro për metër katror nga 1,500 euro që ishin vjet (rritja 20%).

Brenda qytetit të Sarandës çmimet e apartamenteve variojnë 1,500 euro për metër katror për ndërtesa e ndërtuara para 10 vitesh deri në 2.200-2.500 euro për metër katror te ndërtimet e reja me vendndodhje 500 deri 1,000 metra larg detit.