Historiani Pal Trashaj nga Lezha, mesditën e 2 korrikut, piu helm para dyerve të SPAK-ut, duke ndërruar jetë disa orë më pas në spital, si akt ekstrem revolte kundër padrejtësisë dhe përballje disavjeçare me bandën e mikrokredive.
Karteli i mikrokredive Olsi Ibro dhe Arben Meskuti, përmes MCA që e ka marrë në dorë prokuroria, i kishin bllokuar Palit dhe të afërmeve të tij të gjitha pasuritë dhe llogaritë bankare, për disa këste kredie të pretenduara si të pashlyera te NOA, në vlerën 90 mijë lekë.
Kalvari i Pal Trashajt nis me institucionin financiar jo bankar NOA, themeluar në vitin 2001, me nipt K11604002V. Noa fillimisht quhej “PARTNERI SHQIPTAR NE MIKROKREDI” dhe më pas “Opportunity Albania”.
NOA i ka shitur kredinë e ‘keqe’ të Palit bandës MCA-ADCA të dyshes Ibro-Meskuti (ky i fundit në burg).
Në krye të Noa-s si administratore janë Ariola Çela dhe Herjola Spahiu.
Ashtu si emblema e pastrimit të parave me Abi Bank Andi Ballta, i cili kamuflohet pas SHBA, edhe NOA thekson se është themeluar nga USAID.
Në fakt pronari i NOA-s është Astrit Hana, i kamufluar pas disa kompanive të regjistruara në Holandë.
NOA Holdings N.V me numër regjistrimi 33268765 dhe me seli në adresën Prins Bernhardplein 200, 1097 JB, Amsterdam, Holandë, ka në pronësi Noa-n në Tiranë, institucion mikrokredie.
MCA i kërkon Pal Trashajt rreth 5 mijë euro, më shumë se pesfishin e shumës së pretenduar të papaguar nga NOA.
Pra Noa i ka shitur kreditë e këqija MCA, bandë e cila shumfishon detyrimin si dhe shtrëngon qytetarin për t’i marrë pasurinë.
MCA-ja e dyshes Olsi Ibro dhe Arben Meskuti bashkëpunon me përmbaruesin Helidon Xhindi për bllokimin e pasurive të Pal Trashajt, me qëllim për t’a shtrënguar për të dhënë paratë.
Djali i Pal Trashajt, Gledis Trashaj, tha dje se procesin e bllokimit e ka kryer shoqëria përmbarimore Ardael, me anë të përmbaruesi Helidon Xhindi.
Pronar i shoqërisë përmbarimore Ardael është shtetasi Ardian Elezi.
Prapaskena mëson se përmbaruesi Helidon Xhindi ishte shkarkuar nga Gazmend Bardhi që në 2017 dhe nuk kishte fare vulë.
Bankat e nivelit të dytë, përfshirë BKT, ka zbatuar urdhrin e përmbaruesit për bllokimin e llogarive të Pal Trashajt.
Ndërkaq, Pal Trashaj ka këmbëngulur se i ka shlyer këstet e kredisë që ka marrë te Noa. Trashaj është endur dyerve të prokurorisë dhe gjykatave duke kërkuar drejtësi. Vetëm media e ka dëgjuar dhe pasqyruar shqetësimin e tij.
Në vitin 2022, Pal Trashaj i është drejtuar me një letër drejtorit të BKT, turko-pakistanez Seyhan Pencabligil, të besuarës së tij Arjana Xhafa dhe guvernatorit të Bankës së Shqipërisë Gent Sejko, duke kërkuar nga BKT t’i zhbllokonte llogaritë bankare, ndërsa denoncon skemën mashtruese të MCA.
Ish drejtoresha e Prokredit Bank, Arjana Xhafa, dirigjente dhe në aferën e shoqërisë aksionere “Miell Tirana”, ka organizuar një skemë banditeske për të marrë “pjesën” nga mijëra klientët “e bllokuar” prej borxheve që kanë te mikrokreditë, në bashkëpunim me turkun Seyhan Pencablıgil.
Arjana Xhafaj i përgjigjet Pal Trashajt se nuk ia zhbllokon llogaritë pa paguar 4.8 milionë lekë te përmbaruesi Helidon Xhindi.
Siç e konfirmon kjo shkresë, BKT është bërë palë me bandën MCA, e cila është goditur pjesërisht nga Prokuroria e Tiranës.
Për 90 mijë lekë të pretenduara që Noa thotë se nuk i ka shlyer Pal Trashaj, banda MCA kërkon 5 mijë euro. Dhe për 5 mijë euro, banda MCA i ka bllokuar Pal Trashajt dhe familjarëve të tij shtëpinë, toka, çdo pasuri të paluajtshme dhe llogaritë bankare.
Kjo skemë grabitje është lejuar nga Banka e Shqipërisë, e cila po hetohet nga SPAK.
