Ka ndërruar jetë ne spital 63-vjecari Pal Trashaj, i cili mesditën e djeshme piu fotoksinë para prokurorisë së SPAK ku kishte shkuar për të takuar një hetues të BKH-së.

Burri nga Lezha, sikurse ka bere te ditur gjate kontakteve me gazetaret ishte viktimë e mashtrimeve me mikrokreditë.

Burime nga QSUT bënë me dije se ai ndërroi jetë mëngjesin e sotëm.

Sipas burimeve, mesohet se për nje kredi 76 mijë lekë të reja, kompania e mikro kredive dhe permbarimi i kishin bllokuar qytetarit shtëpinë, tokën, makinën e pagën.

Reagimi i djeshem i prokurorise:

Në lidhje me incidentin e sotëm të qytetarit Pal Trashaj të ndodhur jashtë Prokurorisë së Posaçme, institucioni ynë i uron z. Trashaj shërim të shpejtë!

Sqarojmë se qytetari në fjalë është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022.

Më pas oficeri i informacionit ka bërë me dije qytetarin të presë sa të njoftojë hetuesin e çështjes mbi kërkesën e tij. Ndërkohë që oficeri i informacionit ka marrë kontakt me hetuesin e çështjes, qytetari ka dalë jashtë në oborr, duke mos ardhur për të marrë përgjigje.

Pas disa orësh, jashtë ambjenteve të SPAK, janë parë shërbimet spitalore të urgjencës dhe aty është mësuar rreth veprimit të ndërmarrë nga z. Trashaj.

Institucioni ynë ka bërë menjëherë verifikimet rreth këtij incidenti për të sqaruar çdo veprim të punonjësve të tij.

Prokuroria e Posaçme, garanton se do t’i përgjigjet në kohë çdo qytetari me korrektësi dhe në zbatim të ligjit për çështje që janë në kompetencën e saj.