Kryebashkiaku i Gjirokastrës, Flamur Golemi, ka bërë një mesazh ngushëllimi për Fredi Mërkurin, futbollistin veteran të Butrintit, i cili ndërroi jetë papritur dje në fushën e lojës. Golemi sjell në vëmendje njohjen personale me të për shkak se djali, Mario, luan me ekipin e Luftëtarit në Gjirokastër. Më poshtë reagimi i plotë i Golemit.

“Me Fredi Mërkurin isha takuar disa herë për shkak të Marios, djalit të tij të talentuar që luan me Luftëtarin. Më trishtoi shumë lajmi i ndarjes së tij të parakohshme nga jeta, jo vetëm prej ndjesisë personale nga njohja me të, por edhe për atë që përfaqësonte Fredi, një veteran i futbollit në Sarandë, një qytetar i mirë dhe prind i shkëlqyer.

Sot e tutje s’do të jetë më fizikisht mes nesh, por për kaq shumë sa ka dhënë e ka bërë, Fredi Mërkuri s’do të harrohet kurrë. Me emrin e tij krenohet familja, krenohet Butrinti e Saranda. Jam i bindur se Mario do të shkëlqejë në futboll dhe babain do ta ketë një këshilltar të pazëvendësueshëm në çdo hap të rrugëtimit të tij. Lamtumirë Fredi, lamtumirë miku ynë!”