Serbia ka kërcënuar sërish me ndërhyrje ushtarake në Kosovë, nëse, siç pretendojnë ata, nuk mbrohen të drejtat e pakicave serbe të Kosovës nga forcat paqeruajtëse të NATO-s.
Deklaratën e ka bërë shefi i shtabit të ushtrisë serbe, Milan Mojsilovic gjatë një deklarate “urgjente” për media, ku ka thënë se serbët e Kosovës janë “nën kërcënimin terrorist të autoriteteve etnike shqiptare të Kosovës”.Mojsilovic tha se serbët e Kosovës nuk mund ta “tolerojnë më terrorin” e qeverisë së Kosovës dhe se ushtria serbe është e gatshme të përmbushë detyrat e saj “në përputhje” me kushtetutën serbe dhe çdo urdhër të presidentit Aleksandër Vuçiç.
Prej disa javësh tashmë, ushtria serbe është vendosur në kufi me Kosovë, pas rritjes së tensioneve mes dy vendeve.
Veprimet e papërgjegjshme të autoriteteve serbe arritën kulmin kur urdhëruan shkeljen e territorit të Kosovës dhe rrëmbimin e tre policëve shqiptarë që prej disa ditësh po mbahen në Beograd.
