Natasha Rombula, 67-vjeçe, është arrestuar pasi shfrytëzonte në TikTok nipin 10-vjeçar bashkë me babain e tij.

67-vjeçarja dhe djali i saj, Armando Kumaraku shfrytëzonin 10-vjeçarin dhe e detyronin të përdorte fjalor banal në videot e publikuara prej tyre në rrjetin social TikTok. Por 67-vjeçarja dhe djali i saj, nuk janë të panjohur për publikun shqiptar pasi historia e tyre për kujdestarinë e 10-vjeçarit është trajtuar në një emision televiziv në vitin 2017.

Asokohe Natasha dhe nusja e saj Eglantina debatuan live në emision për martësën e shkëputur me Armandon dhe kujdestarinë e djalit të Eglantinës.

Natasha e akuzonte nusen se nuk dinte të rriste djalin dhe se donte të punonte, ndërsa Eglantina kërkonte djalin e saj dhe akuzonte vjehrrën se po i largonte fëmijën duke i thënë se e kishte nënën kuçedër.

“Unë nuk ia lë se ajo është e papërgjegjshme. Vetë mamaja e Eglës më ka thënë se nuk ka besim tek ajo as për të larë e për të shpërlarë, për të hekurosur, si mund të kem unë besim për t’i lënë nipin tim? “Ti je e tmerrshme, je e sëmurë. Je një teatrin e Hollyëood. Nënat nuk janë si ty që shikojnë qejfin e tyre dhe harrojnë fëmijën, që s’i japin qumështin fëmijës”, shprehej e revoltuar Natasha.

Ndërkohë Eglantina e akuzonte vjehrrën si shkaktare për gjithë këtë situatë. Ajo thoshte se e ka respektuar Natashën, madje ka marrë edhe kredi për të.

“Po të them për herë të fundit: Ti je shkaktarja kryesore që unë jam këtu sot. Mua më vjen keq se ne të dyja kemi qenë si shoqe dhe nuk më erdhi aspak mirë që mohove faktin që kam marrë kredi për ty zonjë e nderuar. Unë nuk mund të bëj më shoë siç bën babai i djalit. Unë kam qenë 9 muaj me leje lindje në Sarandë. Unë i kam marrë ato dy kredi pasi jam njohur me Armandon, në qytetin e Sarandës”.

Debati i tyre në emision nuk u zgjidh dhe çështja i kaloi Gjykatës së Gjirokastrës e cila vendosi përfundimisht për kujdestarinë e djalit.