Profesori Ferhat Bejtullahi humbi jetën mbrëmjen e 2 dhjetorit, pasi u godit nga një veturë në rrugën ‘Bill Klinton’ dhe për pasojë pësoi lëndime të rënda, që nuk arriti t’iu mbijetojë përkundër që u dërgua në QKUK për trajtim. Por i dyshuari që shkaktoi këtë aksident me fatalitet, Vullnet Gashi, edhe pse u shoqërua në Polici, ndaj tij nuk u lëshua vendim për masën e ndalimit policor, raporton Gazeta Sinjali.

Lidhur me këtë, dy muaj më vonë kanë reaguar publikisht nga familja e të ndjerit Bejtullahu, të cilët kanë akuzuar institucionet për mosveprim të drejtë manipulim provash.

“REAGIM lidhur me mos veprimin e drejtë apo “manipulimin e provave” të institucioneve ligj-zbatuese në rastet e fundit, duke përfshirë rastin e babit tim.

SOT bëhen 2 muaj e 7 ditë nga tragjedia që goditi familjen time e unë sorollatem nga institucioni në institucion, dërgoj me dhjetëra emaila e nuk kam as një përgjigje – CKA PO NDODHE?

Pavarësisht rezistencës sime dhe refuzimit për t’u përfshirë në postime e dhënë deklarata për medie edhe pse më është kërkuar disa here në lidhje me rastin e babait tim, sot, kur po shoh që raste të ngjashme po vazhdojnë të ndodhin çdo javë, po e ndiej përgjegjësi morale të reagoj publikisht në lidhje mos veprimin apo “manipulimin e provave” nga institucionet ligj-zbatuese në rastet e fundit”, thuhet në postimin e vajzës së profesorit, Sihana Bejtullahu.

Sipas saj, mënyra se si Policia dhe Prokuroria kanë trajtuar rastin në fjalë, si dhe rastin e vrasjes së 18-vjeçarit në Podujevë, e shtynë të rrëfejë publikisht ‘padrejtësitë’.

“Këtë reagim nuk do ta shkruaja nëse institucionet do kishin kryer punën e tyre si duhet apo adresojnë shqetësimet tona me shkrim pas ndodhjes së rastit. Por, mënyra se si Policia dhe Prokuroria e Kosovës e trajtoi rastin e vrasjes së babit tim dhe vrasjes makabre të djalit 18-vjeçar në Podujevë ishte alarm tjetër që nuk mund ta shpërfillja dhe tregoj edhe padrejtësitë në lidhje me rastin e babit tim.

Babi im u godit me veturë, në pikë të ditës, midis Prishtinës e midis dhjetëra njerëzve tjerë që ishin pjesëtarë të komunikacionit atë ditë të 2 dhjetorit 2023.

Personi që ishte vozitës i makinës Porsrche 911, vendosi të shtypte gazin për të tejkaluar kolonën e krijuar te sheshi Bill Clinton (vend zakonisht shumë i ngarkuar) ku në mes të ditës të kalojë në traken (shiritin) e autobusit, ku goditi me shpejtës marramendëse një këmbësor, një burrë me emër e mbiemër, babin tim.

Po na rastisi edhe që vozitësi të jetë i biri i një personi shumë të pasur dhe të fuqishëm, jo vetëm në rrafsh ekonomik, por edhe politik. Rrjedhimisht, ky njeri, pavarësisht së kaluarës me disa vepra penale me fatalitet në komunikacion (që besoj mediat mund të marrin informata të saktë), nuk e ka mbajtur as një orë burg deri më tani!!!

Ndoshta një jetë, e as dy nuk mjaftojnë që prokuroria ta dërgojë dikë në mbajtje. Por teksa prokuroria mbase pret për më shumë jetë, për ne ajo jetë ishte GJITHCKA!”, thuhet në reagimin e familjes.