Nënë e bijë, Eleni dhe Ornela Vangjeli u gjetën të pajeta në banesën e tyre në lagjen 17 në Korçë. Tragjedia ka ndodhur në qytetin e Korçës.

Dyshimet janë që nënë e bijë kanë ndërruar jetë prej 5 ditësh, kur kanë humbur kontaktet me familjarët. Ornela, 54-vjeçe mund të ketë pësuar atak kardiak, ndërsa nëna Eleni, 75-vjeçe e cila ishte e paralizuar, ka ndërruar jetë pas saj.

Edhe në pamundësi për të lëvizur, dhe për shkak të mungesës së ilaçeve në banesë. 54-vjeçarja ishte me profesion mësuese në Vithkuq, dhe vëllai që jetonte në Greqi ka ardhur në banesë dhe i ka gjetur në banesë të vdekura pas ndërhyrjes së zjarrfikësve për hapjen e derës.

“Më datë 01.02.2024, rreth orës 16:42, në lagjen nr. 17, Korçë, në banesë, janë gjetur pa jetë, pa shenja dhune shtetaset E. V., 75 vjeçe dhe vajza e saj O. V., 54 vjeçe. Nga të dhënat e para, rezulton se këto shtetase nuk ju ishin përgjigjur në telefon familjarëve të tyre, prej disa ditësh”, njoftoi policia.

Dera e banesës së tyre është hapur nga shërbimet e zjarrfikësve, pasi ishte e kyçur nga brenda. Paraprakisht dyshohet se këto dy shtetase mund të kenë humbur jetë për shkaqe natyrale.