Klara Sanduloviq, e bija e politikanit serb Nikola Sanduloviq, pas homazheve sot në Prekaz, është ndalur nga Policia e Serbisë në Merdarë.
Lajmi është bërë i ditur nga kryetari i Partisë Republikane Serbe, Nikola Sanduloviq përmes një postimi në rrjetin social X. Ai ka thënë se vajzës së tij nuk i është lejuar kthimi në Serbi.
“Regjimi diktatorial i Aleksandër Vuçiq vazhdon të persekutojë vajzën time Klara. Policia e mban atë së bashku me zyrtarët e Partisë Republikane në pikën kufitare Merdarë dhe nuk i lejon të hyjnë në Serbi”, ka shkruar Sanduloviq.
Klara Sanduloviq sot bëri homazhe në Prekaz, te varri i Blerina Jasharit, vajzës shtatëvjeçare të vrarë nga forcat serbe gjatë kohës së luftës në Kosovë.
Nikola Sansuloviq kishte bërë homazhe më herët në Prekaz, për çka pas kthimit në Serbi u rrah brutalisht nga BIA serbe. Pas tij, homazhe në Prekaz kishte bërë edhe avokati Çedomir Stojkoviq, i cili ishte ndaluar më pas për katër orë në Merdarë nga autoritetet serbe, por ishte lejuar të kalojë në Serbi.
