Sipërmarrësi shqiptar i cili jeton në Itali, Qëndrim Thaçi ka prezantuar makinën e parë shqiptare të quajtur “Illyrian Pure Sport”.

Thaçi kishte qenë gjithmonë adhurues i makinave që nga fëmijëria, por pavarësisht sfidave arriti që të prodhojë një makinë e cila tani pritet t’i bëjë konkurrencë edhe modeleve të njohura sikurse Lamborghini Aventador apo Ferrari 812 Superfast.

“Gjyshi më la amanet, që ta çojë këtë punë deri në fund. Nderin e kam mësu prej familjes time shqiptare, shqiptarët punojnë shumë. Për këtë arsye u ktheva në Kosovë, pasi ne mund të bëjmë gjëra shumë të mira”, tha Thaçi.

Thaçi ka qenë i përfshirë në projekte shumë të mëdha sikurse për brendet Ferrari dhe Lamborghini. Sipas Thaçit, makina Illyrian Sport Pure do të jetë në mesin e 5 automjeteve më të shpejta në botë.

Çmimi i automjetit sportiv do të variojë nga 1.2 milionë euro deri në 1.7 milionë euro. Supervetura e re Illyrian Pure Sport ka një motor 6.2 litërsh LT2 V8 nga 650 kuaj fuqi deri në 950 kuaj fuqi. Shpejtësia maksimale pritet të arrijë në 375 kilometra në orë.