Siç mund të keni lexuar/dëgjuar, vetëvrasja e 41-vjeçares Bedrie Loka ka një pistë të re dhe lidhet me dhunën e ushtruar nga i shoqi, Xhemal Loka. Materialet e siguruara nga policia, si mesazhe dhe video kërcënuese tregojnë se i shoqi e dhunonte fizikisht dhe psikologjikisht të ndjerën në mënyrë të vazhdueshme. Dyshimet e autoriteteve i kanë konfirmuar edhe dëshmitë tronditëse të 4 fëmijëve të çiftit, të cilët kanë dhënë detaje drithëruese mbi marrëdhënien e prindërve.

Dëshmitë e tyre, të siguruara nga TV Klan sjellin aspekte të ndryshme të një raporti të ndërlikuar të një martese 23-vjeçare. “Mami dhe babi kanë pasur debate me njëri-tjetrin dhe s’i kanë pasur mirë marrëdhëniet. Një ditë para se të vdiste mami, para se të pinte hem, kanë bërë një debat të fortë, sepse (babi) nuk e lejonte mamin të shkonte te shtëpia e gjyshes. Ai filloi duke e sharë dhe ofenduar mamin tim”.

Sipas vajzës, atë mbrëmje, debate ka nisur rreth orës 17:00 dhe ka përfunduar në orën 23:00. “Babi, kur ka qenë në Greqi, gati 1 vit më parë, e ka marrë mamin në cellular dhe i ka thënë se do e bënte që të vriste veten dhe këtë duhet ta mbante mend”, duke shtuar se 41-vjeçarja është kërcënuar dhe ofenduar nga bashkëshorti. “Mami ka pasur konflikte të herëpashershme me babin”, konfirmoi vajza.