Servet Karaj, babai i 15-vjeçarit që vrau Fatjon Bicin në Gramsh, ka folur për ngjarjen e rëndë, duke thënë se ndihet i tronditur dhe i kërkon ndjesë familjes së viktimës.

“I kërkoi falje jashtë mase. Edhe unë e quaj djalin tim se njëlloj janë. Jam gati që të shkoj që sot te familja e tyre nëse pranojnë”, tha Karaj.

Ai thotë që e përjeton trishtimin njëlloj si familja e Fation Bicit dhe kërkon që drejtësia të bëjë detyrën e vet.

“Mjerë ai që iku se ky do rrijë e do dale, por ai s’del më atje ku iku. Mjerë familja e shkretë dhe ne që na zuri…”, u shpreh Karaj në një prononcim për Report TV.

Mes të tjerave Servet Karaj tha se nuk e dinte që djali i tij mbante thikë me vete, duke shtuar se i biri ishte i rregullt dhe aspak problematik. Ai shton se 10 minuta para se të ndodhte ngjarja e rëndë, kishte qenë në Gramsh.

“Djali ka qenë shumë i qetë, nuk merrej me gjëra të tilla. Atë ditë nuk ka shkuar në shkollë se kishte probleme shëndetësore. Unë isha vetë në Gramsh e 10 minuta pasi jam kthyer më kanë marrë në telefon. Jam habitur. Sjellja e djalit ka qenë normale, nuk të linte përshtypje. Nuk di si të them, nuk kam parë asgjë vete.

Në polici na thirrën për deklaratën. Nuk i kam parë asgjë as në cantë, as në xhep. Djali nuk ka pasur raste të tilla, nuk kam dëgjuar asnjëherë debat. Nuk kishim asnjë informacion se po të kisha sikur 2% të dija nuk do të kishte arritur deri këtu. Shkonte në shkollë zakonisht, ishte nxënës mesatar, i rregullt, të shtuna të diela punonte, nuk ishte problematik”, tha babai i autorit të vrasjes së 15-vjeçarit.

Kujtojmë që 15-vjeçari Fatjon Bici, nxënës i klasës së 9-të ishte nisur për në shkollë, por nuk u kthye kurrë në shtëpi. Viktima u godit me thikë në zemër pasi u fut për të ndarë sherrin mes kushuririt të tij dhe disa bashkëmoshatarëve në shkollë. Ai u vra në një park të Gramshit, ndërkohë që kushëriri i tij Marko Lici mbeti i plagosur rëndë dhe u transportua në spitalin e Traumës.

Konflikti që u bë shkak për ngjarjen e rëndë kishte nisur disa ditë më parë, kur të rinjtë ishin konfliktuar me sharje në rrjetet sociale.